निलो मसि 
काठमाण्डाै – ललितपुरमा जारी ऐतिहासिक कात्तिक नाचको मुख्य आर्कषण नृसिहं अवतारको नाच देखाएर आज सकिँदैछ । आज बेलुकी ७ बजेपछि मंगलबजारको कात्तिक दबलीमा नृसिंह अवतारको नाच प्रदर्शन गरिने कात्तिक नाच संरक्षण समितिका अध्यक्ष किरण चित्रकारले बताउनु भयो ।
आजको नाचमा नारायणको अवतार नृसिंहले हिरण्यकशिपुलाई बध गरेको पौराणिक कथा प्रस्तुत गरिनेछ । नाचमा नृसिंह भएर राजोपाध्याय समुदायको कलाकारले खेल्ने गर्दछन् भनेर हिरयण्कशिपु भएर चित्रकार समुदायको कलाकारले खेल्ने चलन छ । यो नाच तान्त्रिक शक्तिमा आधारित नाच भएकोले नाचमा खेल्ने कलाकारहरुले भोकै बस्नु पर्ने लगायतका नियम पालना गर्नु पर्ने चित्रकारले बताउनु भयो ।
नाचमा हिरण्यकशिपु भएर खेल्ने कलाकारलाई नृसिहंले काखमा राखेर नङ्गले कोपरेर बध गरेपछि तलेजुका पुजारीले जल अभिषेक गरेर ब्युँताउने परम्परा छ । तान्त्रिक नाच भएकोले आजका दिन मंगलबजारमा नाच हेर्न आउने दर्शकहरुको भीड हुने गर्दछ । यसपाली ८ दिन मात्र सञ्चालन गर्ने गरी गएको कात्तिक २४ गतेदेखि शुरु भएको कात्तिक नाच आज नृसिहं अवतारको नाचसँगै सकिनेछ ।
हिजो बराह अवतारको नाच देखाइएको थियो । नेपालको इतिहासमा सबैभन्दा लामो समयदेखि निरन्तर रुपमा सञ्चालन भएको यो नाच नेपाल सम्वत् ७६१ मा राजा सिद्धिनरसिंह मल्लले शुरु गर्नु भएको हो । यस वर्ष यो नाच सञ्चालन भएको तीन सय ८१ वर्ष लागेको छ ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया