निलो मसि 
कपिलवस्तु । कपिलवस्तु निर्वाचन क्षेत्र नं. १ मा प्रतिनिधि सभा सदस्यका लागि चुनावी सरगर्मी तीव्र बनेको छ । बहुकोणीय प्रतिस्पर्धाका बीच प्रमुख दलका उम्मेदवार र स्वतन्त्र उम्मेदवार आ-आफ्नो पक्षमा माहोल बनाउन सक्रिय देखिएका छन् ।
यस क्षेत्रमा स्वतन्त्र उम्मेदवार आशिष शर्माले ‘जीप’ चिन्ह लिएर चुनावी मैदानमा उत्रिएका छन् । नेपाली काँग्रेसबाट असन्तुष्ट भएपछि स्वतन्त्र उम्मेदवारी दिएका शर्माले घरदैलो, टोलभेला र सामाजिक सञ्जालमार्फत आक्रामक प्रचार गरिरहेका छन् ।
विशेषगरी युवातर्फ उनको आकर्षण बढ्दो देखिएको स्थानीयको भनाइ छ । नयाँ सोच र वैकल्पिक नेतृत्वको एजेन्डासहित मैदानमा उत्रिएका शर्माको पक्षमा जनलहर देखिएको दाबी समर्थकहरूले गरेका छन् ।
यता नेपाली कम्युनिष्ट पार्टीबाट उम्मेदवारी दिएका कृष्ण बहादुर कुँवर ‘तारा’ चिन्ह लिएर प्रतिस्पर्धामा छन् । पार्टी संगठन र वाम मतदाताको आधार बलियो रहेको भन्दै कुँवरले जितको सम्भावना देखिएको टिप्पणी भइरहेको छ । अन्य उम्मेदवारको तुलनामा कुँवर संगठित ढंगले चुनावी अभियान अघि बढाइरहेका छन् । अरु पार्टीमा आकर्षण नदेखिँदा निर्वाचन जित्ने दाउमा छन् ।
नेपाली काँग्रेसबाट अतहर कमाल चुनावी मैदानमा छन् । पार्टीको परम्परागत मताधार जोगाउँदै थप मत आकर्षित गर्ने रणनीतिमा रहेका कमालले विकास, समावेशिता र क्षेत्रीय मुद्दालाई प्राथमिकतामा राखेर प्रचार गरिरहेका छन् । काँग्रेसभित्रको असन्तुष्टिको असर मतपरिणाममा कत्तिको पर्छ भन्ने चासो पनि बढेको छ ।
त्यसैगरी नेकपा एमालेबाट विश्राम प्रसाद चौधरी उम्मेदवार बनेका छन् । यद्यपि स्थानीय स्तरमा उनको चर्चा अन्य प्रतिस्पर्धीको तुलनामा कम देखिएको बताइन्छ । एमालेको संगठन भए पनि जनमत तुलनात्मक रूपमा कमजोर देखिएको विश्लेषण गरिएको छ ।
अन्य उम्मेदवारहरूको प्रभाव उल्लेखनीय नदेखिएकाले मुख्य प्रतिस्पर्धा स्वतन्त्र उम्मेदवार शर्मा र नेकपा तर्फका कुँवरबीच केन्द्रित हुने आँकलन गरिएको छ । युवातर्फ बढ्दो मतदाता आकर्षण र पार्टीगत समीकरणले अन्तिम परिणाम कस्तो आउँछ भन्नेमा व्यापक चासो बढेको छ ।
कपिलवस्तु-१ मा यसपटकको चुनाव केवल दलगत प्रतिस्पर्धामात्र नभई नयाँ र पुराना राजनीतिक शक्तिबीचको परीक्षणका रूपमा हेरिएको छ । मतदाताको अन्तिम निर्णयले क्षेत्रको राजनीतिक दिशा तय गर्नेछ ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया