निलो मसि 
कृष्णनगर, १९ फागुन ।
आसन्न प्रतिनिधि सभा सदस्यकाे लागि फागुन २१ हुने निर्वाचनको सुरक्षालाई मध्यनजर गर्दै कपिलवस्तु जिल्लाका सीमावर्ती नाकाहरू तीन दिनका लागि पूर्ण रूपमा बन्द गरिएका छन् । विशेषगरी कृष्णनगर नाका लगायत अन्य साना-ठूला नाकामा आवतजावतमा रोक लगाइएको हो ।
जिल्ला प्रशासन कार्यालय कपिलवस्तुले जारी गरेको सूचनाअनुसार निर्वाचनको अघिल्लो दिनदेखि मतगणना कार्य सम्पन्न नभएसम्म सीमा नाका बन्द रहनेछ । यस अवधिमा नेपाल-भारत सीमा हुँदै हुने आवागमन पूर्ण रूपमा निषेध गरिने जनाइएको छ । अत्यावश्यक सेवा, एम्बुलेन्स तथा सुरक्षा निकायका सवारीसाधनलाई भने आवश्यक समन्वयपछि आवतजावतको अनुमति दिइने बताइएको छ ।
.प्रमुख जिल्ला अधिकारीले खुला सीमाका कारण निर्वाचनका बेला हुन सक्ने अवाञ्छित गतिविधि नियन्त्रण गर्न तथा शान्ति-सुरक्षा कायम राख्न यस्तो निर्णय गरिएको जानकारी दिएका छन् । सीमावर्ती क्षेत्रमा नेपाल प्रहरी र सशस्त्र प्रहरी बलको सुरक्षा निगरानी कडा पारिएको छ ।
नाकाबन्दीका कारण दैनिक उपभोग्य वस्तु ढुवानी, साना व्यापारी तथा सीमा क्षेत्रमा निर्भर स्थानीय बासिन्दामा केही असहजता देखिएको छ । यद्यपि प्रशासनले निर्वाचन शान्तिपूर्ण, निष्पक्ष र मर्यादित रूपमा सम्पन्न गर्न सबै पक्षसँग सहयोगको अपिल गरेको छ ।
कपिलवस्तुमा भारतसँग जोडिएका प्रमुख नाकामध्ये कृष्णनगर क्षेत्रको नाका अत्यन्त व्यस्त मानिन्छ । यहाँबाट दैनिक सयौं सर्वसाधारण आवतजावत गर्ने गरेका छन् । निर्वाचन सम्पन्न भई सुरक्षा अवस्था सामान्य भएपछि नाका पुनः नियमित रूपमा सञ्चालनमा आउने प्रशासनले जनाएको छ ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया