निलो मसि 
घनश्याम भर
(विजयनगर) कपिलवस्तु, ३ भदौ ।
कपिलवस्तुको विजयनगर गाउँपालिका-७ गणेशपुरमा अवस्थित लौटनराम द्रौपदी देवी माध्यमिक विद्यालयमा नयाँ चार कोठे भवनको शिलान्यास गरिएको छ । पूर्व सांसद स्वर्गीय मंगल प्रसाद गुप्ताकी श्रीमती स्वतन्त्रता देवी गुप्ता, गाउँपालिका अध्यक्ष गोपाल बहादुर थापा, उपाध्यक्ष लक्ष्मी कुमारी चौधरी र वडा अध्यक्ष दिनेश कुमार चौधरीले संयुक्त रूपमा भवनको शिलान्यास गरेका हुन् ।
पूर्व सांसद स्वर्गीय मंगल प्रसाद गुप्ताको पहलमा विनियोजित बजेटबाट भवन निर्माण हुन लागेको हो । विद्यालय प्रशासनका अनुसार करिब १ करोड रुपैयाँकाे लागतमा भवन निर्माण हुनेेछ ।
शिलान्यास कार्यक्रममा स्वतन्त्रता देवी गुप्ताले स्वर्गीय श्रीमान् मंगलप्रसाद गुप्ताको शैक्षिक क्षेत्रप्रति विशेष लगाव रहेको बताइन् । शिक्षा क्षेत्रलाई सधैँ प्राथमिकतामा राख्ने उनको सोचअनुसार विद्यालयको विकासमा आफूले पनि सक्दो सहयोग गर्ने प्रतिबद्धता उनले व्यक्त गरिन् ।
गाउँपालिका अध्यक्ष गोपाल बहादुर थापाले विद्यालयको भौतिक पूर्वाधारसँगै शैक्षिक गुणस्तर सुधारलाई गाउँपालिकाले प्राथमिकतामा राखेको बताए । उनले विजयनगरलाई टिनको छानामुक्त विद्यालय बनाउने अभियानमा स्थानीय सरकार लागिरहेको उल्लेख गर्दै नयाँ भवन निर्माणले विद्यार्थीलाई सुरक्षित र व्यवस्थित वातावरणमा पठनपाठन गर्ने अवसर मिल्ने बताए ।
उपाध्यक्ष लक्ष्मी कुमारी चौधरीले विद्यालयको भौतिक पूर्वाधार बलियो भए मात्र शिक्षण-सिकाइलाई थप प्रभावकारी बनाउन सहयोग पुग्ने बताइन् । उनले विद्यार्थीको आवश्यकता र विद्यालयको अवस्थालाई ध्यानमा राखेर विकास निर्माणका कामलाई प्राथमिकता दिनुपर्नेमा जोड दिइन् ।
७ का वडा अध्यक्ष दिनेश कुमार चौधरीले विद्यालयको नयाँ भवन निर्माणले वडाको शैक्षिक विकासमा महत्वपूर्ण योगदान पुग्ने बताए । उनले भवन निर्माणको काम गुणस्तरीय र समयमै सम्पन्न गर्न सबै पक्षको सहकार्य आवश्यक रहेको उल्लेख गरे ।
विद्यालय व्यवस्थापन समितिका अध्यक्ष शिव प्रसाद यादवले नयाँ भवन निर्माणपछि कक्षाकोठाको अभाव कम हुने र विद्यार्थीलाई सहज वातावरणमा अध्ययन गर्ने अवसर मिल्ने बताए । विद्यालयको समग्र विकासका लागि स्थानीय सरकार, समुदाय र अभिभावकबीच निरन्तर सहकार्य आवश्यक रहेको उनको भनाई छ ।
प्रधानाध्यापक श्याम प्रकाश चौधरीले नयाँ भवन विद्यालयका लागि महत्वपूर्ण उपलब्धी भएको बताए । उनले भवन निर्माण सम्पन्न भएपछि पठनपाठन थप व्यवस्थित हुने र विद्यार्थीका लागि सुरक्षित तथा सुविधा सम्पन्न शैक्षिक वातावरण निर्माण हुने विश्वास व्यक्त गरे ।
कार्यक्रममा ५ का वडा अध्यक्ष अनवर माेहम्मद मुसलमान, समाजसेवी गाेपाल प्यारे चन्देल, विजय कुमार चाैधरी, शिक्षाप्रेमी, शिक्षा तथा अभिभावकहरुकाे उपस्थिति रहेको थियोे ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया