निलो मसि 
घनश्याम भर
(विजयनगर) कपिलवस्तु, २७ साउन ।
लामो समयदेखि पर्याप्त वर्षा नहुँदा खेतबारी सुक्दै गएको र भूमिगत पानीको सतहसमेत घट्दै गएपछि कपिलवस्तुको विजयनगर गाउँपालिकाले गाउँपालिका क्षेत्रभित्र सञ्चालनमा रहेका सबै डीप बोरिङ अर्को सूचना जारी नभएसम्म बन्द गर्न निर्देशन दिएको छ ।
गाउँपालिकाले जारी गरेको आधिकारिक सूचनामा वर्षायाममा समेत पर्याप्त वर्षा हुन नसक्दा मनसुनजन्य खेती प्रभावित भएको उल्लेख छ । खेतीका लागि डीप बोरिङको अत्यधिक प्रयोग हुँदा भूमिगत जलस्रोतको दोहन बढेको र कतिपय बस्तीमा खानेपानीको आपूर्तिमा समेत समस्या देखिन थालेको गाउँपालिकाले जनाएको छ ।
गाउँपालिकाका अध्यक्ष गोपाल बहादुर थापा मगरले भूमिगत पानीको संरक्षण र नागरिकको खानेपानीको आवश्यकता दुबैलाई ध्यानमा राखेर डीप बोरिङ सञ्चालन रोक्ने निर्णय गरिएको बताएका छन् । खेती जोगाउन भूमिगत पानीको प्रयोग बढाउँदै जाँदा भोलिका दिनमा खानेपानीकै संकट गहिरिन सक्ने भएकाले अहिले नै जलस्रोत संरक्षणमा संवेदनशील हुनुपर्ने उनको भनाई छ ।
त्यस्तै गाउँपालिकाका प्रमुख प्रशासकीय अधिकृत हिमलाल विश्वकर्माले भूमिगत जलस्रोतको संरक्षण, संवर्द्धन तथा खानेपानीको उपलब्धता र सन्तुलन कायम गर्न डीप बोरिङ बन्द गर्न सम्बन्धित सबैलाई सूचना जारी गरिएको बताए । उनका अनुसार गाउँपालिकाको निर्णयको पालना गर्दै जलस्रोत संरक्षणमा सबै व्यक्ति, संस्था, किसान तथा सरोकारवालाको सहयोग आवश्यक छ ।
पानी नपर्दा किसानको खेतमा धाँजा फाट्दैछ, खेत जोगाउन भूमिगत पानी तान्दा जमिनमुनिको पानी पनि घट्दैछ । यस्तो दोहोरो संकटबीच गाउँपालिकाले तत्कालका लागि डीप बोरिङ बन्द गर्ने निर्णय गरेको हो ।
गाउँपालिकाले अर्को सूचना जारी नभएसम्म क्षेत्रभित्र सञ्चालनमा रहेका सम्पूर्ण डीप बोरिङ सञ्चालन नगर्न आग्रह गर्दै भूमिगत जलस्रोतको संरक्षण तथा खानेपानीको सहज आपूर्तिमा सहयोग गर्न सबैमा अनुरोध गरेको छ ।
अध्यक्ष थापा र प्रमुख प्रशासकीय अधिकृत विश्वकर्माद्वारा जारी आधिकारिक सूचनामा “डीप बोरिङ बन्द गर्ने सम्बन्धमा सूचना” जारी गर्दै यस्तो निर्णय सार्वजनिक गरिएको हो ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया