निलो मसि 
संघीय सरकारले जाजरकोटको नलगाड नगरपालिकामा नयाँ प्रमुख प्रशासकीय अधिकृत खटाएपछि विवाद भएको छ । नगर प्रमुख डम्बरबहादुर रावतले नयाँ खटिएका प्रमुख प्रशासकीय अधिकृतलाई हाजिर नगराउने अडान लिंदै हाल कार्यरतलाई नै केही समय काम गर्न दिनुपर्ने माग गरेका छन् ।
संघीय मामिला तथा सामान्य प्रशासन मन्त्रालयले २७ साउनमा नलगाड नगरपालिकाका प्रमुख प्रशासकीय अधिकृत दिनेश भट्टराईको ठाउँमा गोपाल शाहीलाई कामकाज गर्न खटाएको थियो।
जिल्ला समन्वय समिति जाजरकोटमा कार्यरत शाहीलाई नलगाडमा पठाएर भट्टराईलाई शाहीको ठाउँमा सरुवा गरिएको थियो । तर, नगरप्रमुख रावतले नलगाड नगरपालिकामा प्रमुख प्रशासकीय अधिकृतको पद रिक्त नभएको अवस्थामा पालिकालाई जानकारी नगराई भट्टराईको सरुवा गरिएको भन्दै संघीय मामिला तथा सामान्य प्रशासन मन्त्रालयलाई पत्र नै लेखेका छन् ।
‘तीन तहको सरकारमध्ये सबैभन्दा जनतासँग प्रत्यक्ष जोडिएको स्थानीय सरकारसँग समन्वय नै नगरी कामकाजमा खटाइएकोले मन्त्रालयबाट खटिएका प्रमुख प्रशासकीय अधिकृत गोपाल शाहीलाई कार्यालयमा राखी कामकाजमा खटाउन असमर्थ भएकोले उहाँलाई हाजिर नगराई फिर्ता पठाइएको छ,’ पत्रमा भनिएको छ ।
पत्रमा साविकमा कामकाज गर्दै आएका प्रमुख प्रशासकीय अधिकृत दिनेश भट्टराईलाई प्रमुख प्रशासकीय अधिकृतको रुपमा पुनः खटाउन माग गरिएको छ ।
कर्मचारीहरुले शाहीले नगरपालिकामा हाजिर गर्नसक्ने भन्दै मेयर रावतले हाजिरी किताब लुकाएको दाबी गरेका छन् । तर, मेयर रावतले भने ई-हाजिरी हुने कार्यालयमा हाजिरी किताब लुकाएको दाबी नै गलत भएको अनलाइनखबरसँग बताए ।
‘यहाँको त्रिभुवन माविमा आर्थिक अपचल भएकोबारे जिल्ला प्रशासन कार्यालयले प्रमुख प्रशासकीय अधिकृत दिनेश भट्टराई नेतृत्वमा समिति बनाएको छ, सो प्रतिवेदन प्राप्त नभइन्जेल उहाँको सरुवा नहोस् भन्ने चाहेको हुँ,’ उनले भने,‘केही समयमै त्यो छानबिन सकिन्थ्यो, त्यतिन्जेल सरुवा नहोस् भनेर पत्र लेखेको हुँ ।’
प्रमुख प्रशासकीय अधिकृतका रुपमा आएका शाही स्थानीय नै नभएकोले काममा लगाउन आपत्ति नरहेको उनले बताए । शाहीसँगको छलफलपछि नै आफूले मन्त्रालयमा पत्र लेखेको उनको दाबी छ ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया