निलो मसि 
काठमाडौं : आईसीसी विश्वकप लिग–२ क्रिकेटमा नेपालले कमजोर प्रदर्शन गर्दै आएको छ। खेलेका एकपछि अर्को खेलमा नेपालले पराजय भोगिरहेको छ। पछिल्ला ५ म्याचमा कुनै पनि खेलमा नेपालले जित बटुल्न सकेको छैन।
प्रतियोगिता अन्तर्गत गत फेब्रुअरीमा नेपालमै भएको ४ म्याच र गत सेप्टेम्बरमा क्यानडामा भएका ४ म्याचमा गरी जम्मा एउटा खेल मात्र नेपालले जितेको छ।
घरेलु मैदानमा गत फेब्रुअरीमा नेपालले नामिबिया र नेदरल्याण्ड्ससँग २–२ खेल खेलेको थियो। जसमा नेपालले नामिबियासँग दुबै खेल हार्यो भने नेदरल्याण्ड्ससँग १ खेल जितेर १ खेल हार्न पुग्यो।
नमिबियासँग पहिलो खेलमा ४ विकेट र दोस्रो खेलमा २ विकेटले हारेको नेपालले नेदल्याण्ड्सलाई पहिलो खेलमा २ सय ८ बल बाँकी छँदै ९ विकेटले हराएको थियो भने अर्को खेलमा ८ विकेटको हार भोग्यो।
सेप्टेम्बरमा क्यानडामा भएको टुरमा क्यानडासँग पहिलो खेलमा १ सय ३ रनले तथा दोस्रो खेलमा ५ विकेटले नेपाल पराजित भयो। सोही टुरमा ओमानसँगको एउटा खेल स्थगित भएर नतिजाविहीन हुँदै दुबैले १–१ अंक बाँडे भने अर्को खेलमा नेपाल १ बल बाँकी छँदा मात्र १ रनले पराजित हुन पुग्यो।
अहिले अमेरिकामा ४ मध्ये एउटा खेल सकिएको छ भने दोस्रो खेलमा मंगलबार (आज) नेपालले स्कटल्याण्डसँग खेल्दैछ। अमेरिकाको घरेलु मैदान डालासमा आइतबार राति नेपाल अमेरिकासँग ३ विकेटले पराजित भएको हो। यो हार जारी प्रतियोगितामा नेपालको सातौँ हो।
नेपालले अघिल्लो संस्करणको पनि सुरुमा खराब प्रदर्शन नै गरेको थियो। कुल ३६ खेलमा सुरुवाती २४ खेल सकिँदा नेपाल ७ वटा राष्ट्रमध्ये पपुवा न्युगिनीभन्दा मात्र माथि थियो। तर अन्तिम १२ खेलमा ११ वटा खेल जित्दै ठूलो छलाङ मार्दै नेपालले युएई , अमेरिका र नामिबियालाई पछि पारेको थियो। त्यत्तिबेला नेपाल ४० अंक सहित तेस्रो हुँदा नेपालभन्दा माथि स्कटल्याण्ड र ओमान रहेका थिए।
दोस्रो जितको खोजीमा
प्रतियोगिताको १० औँ खेलमा मंगलबार राती अमेरिकाको डालासस्थित ग्राण्ड प्राइरी रंगशालामा स्कटल्याण्डसँग प्रतिस्पर्धा गर्दा नेपाल दोस्रो जितको खोजीमा हुनेछ।
नेपालले पछिल्ला ५ म्याचमा कुनै जित बटुल्न नसक्दा स्कटल्याण्डले भने पछिल्ला ४ खेल लगातार जितेको छ। स्कटल्याण्डले गत जुलाईमा नामिबियालाई २ पटक र ओमानलाई एक पटक हराएको छ। अमेरिका टुरमा अमेरिकालाई नै स्कटल्याण्डले यसै साता मात्र १० विकेटले पाखा लगाएको छ।
स्कटल्याण्डका ब्याटर एचजी मुसे र आरडि वेरिङटनलाई रोकेर स्कटीस बलर बिजे कुरी र एम म्याकमुक्नेको बललाई समाना गर्न सके नेपालका निम्ती २ अंक पाउन कठिन हुने छैन।
यसैगरी नेपाली ओपनरले राम्रो पार्टनरसीप बनाएर खेलेमा सुरुमै स्कटल्याण्ड दबाबमा पर्न सक्छ। डालासमा ओपनर ब्याटर कुशल भुर्तेल बलिङमा जम्न थालेका छन्। उनले अमेरिकाविरुद्ध ४ विकेट लिए।
उनले ६ ओभर बलिङ गरेर २३ रन खर्चेर ४ विकेट लिएका हुन्। कप्तान रोहित पौडेल पनि सोही खेलमा शतक हान्नबाट ४ रनले मात्र चुके। ७५ बलमा ८ चौका र ३ छक्कासहित ९६ रन बनाएका उनी नेत्रभाल्करद्वारा आउट भएका थिए। नेपाली ओपनर अनिल साह ५६ रन तथा आसिफ शेख ५२ रनमा आउट भए।
९ खेलको समाप्तिमा नेपालले मात्र ३ अंक जोडेको छ। नेपालले १ खेल जित्दा ७ वटा खेल हारेको छ। १ खेल अनिर्णित छ।नेपाल ७ औँ स्थानमा रहेको छ। नेपालले नेदरल्याण्ड्सलाई ९ विकेट हराउन बाहेक खेलेका सबै खेलमा पराजय बेहोरेको छ। ओमानसँगको खेल रद्द भएर १–१ अंक नेपाल र ओमान दुबैले बाँडेका थिए।
१२ खेलमा १६ अंकसहित क्यानडा पहिलो स्थानमा छ भने अमेरिका १० खेलमा १४ अंकसहित दोस्रो स्थानमा छ। ८ खेलबाट नेदरल्याण्ड्सले १२ अंक जोडेको छ भने समान खेलबाट स्कटल्याण्डले ११ अंक जोडेको छ।
१२ खेलबाट नामिबियाले १० अंक बनाउँदा ओमानले ८ खेलबाट ६ अंक बनाएको छ। पुछारमा रहेको युएईको ७ खेलबाट मात्र २ अंक छ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया