निलो मसि 
घनश्याम भर
(विजयनगर) कपिलवस्तु, ३१ बैशाख ।
कपिलवस्तुकाे विजयनगर गाउँपालिकामा सामाजिक तथा लैंगिक मान्यता, खाद्य बानी, आहार विविधता तथा खाद्य सुरक्षा सम्बन्धी सचेतना अभिवृद्धि गर्ने उद्देश्यले अभियान कार्यक्रम सञ्चालन गरिएको छ । किड्स नेपालको आयोजना, विजयनगर गाउँपालिकाको समन्वय तथा प्लान इन्टरनेशनल नेपालको सहयोगमा गाउँपालिका-६ प्रेमनगर हाट बजारमा कार्यक्रम सञ्चालन गरिएको हो । समुदाय स्तरमै पोषण, सन्तुलित आहार र खाद्य सुरक्षाबारे जनचेतना फैलाउने उद्देश्यले कार्यक्रम आयोजना गरिएको किड्सका कार्यक्रम संयाेजक रजनिश चाैधरीले जानकारी दिए ।
उनका अनुसार कार्यक्रममा सहभागीहरुलाई सन्तुलित आहार खाने तरिका, घरमै करेसाबारी स्थापना गरी ताजा तरकारी तथा पोषणयुक्त खाद्यवस्तु उत्पादन गर्ने विधि, कुपोषण न्यूनीकरणका उपाय तथा खाद्य विविधताको महत्व, ५ वर्षमुनिका बालबालिकाको वृद्धि अनुमान, स्थानीय स्तरमा उपलब्ध खाद्य सामग्रीको प्रयोग बढाएर परिवारको पोषण अवस्था सुधार गर्न सकिने विषयमा जोड दिइएको छ ।
कार्यक्रममा विजयनगर गाउँपालिका अध्यक्ष गाेपाल बहादुर थापाले स्थानीय उत्पादन र स्वस्थ खानपानको संस्कार विकास गर्न यस्ता कार्यक्रम प्रभावकारी हुने बताए । उनले कुपोषण नियन्त्रण तथा स्वस्थ समुदाय निर्माणका लागि गाउँपालिकाले स्वास्थ्य तथा पोषणसम्बन्धी अभियानलाई प्राथमिकतामा राखेको उल्लेख गरे ।
त्यस्तै वडा नम्बर ६ का वडा अध्यक्ष प्रेम बहादुर कलवारले समुदाय स्तरमा पोषण र खाद्य सुरक्षाबारे जनचेतना बढ्दै जाँदा बालबालिका तथा महिलाको स्वास्थ्य अवस्थामा सकारात्मक सुधार आउने विश्वास व्यक्त गरे ।
स्वास्थ्य शाखा प्रमुख यज्ञ प्रसाद अधिकारीले पोषणयुक्त खाना, सरसफाई र आहार विविधता अपनाउन सके कुपोषण न्यूनीकरणमा ठूलो सहयोग पुग्ने बताए । उनले घरपरिवारमै करेसाबारी प्रवर्द्धन गरी स्थानीय उत्पादनको प्रयोग बढाउन आग्रह गरे ।
कार्यक्रममा स्थानीय जनप्रतिनिधि, स्वास्थ्यकर्मी, अभिभावक तथा समुदायका सर्वसाधारणको सहभागिता थियो । सहभागीहरुले यस्ता सचेतनामूलक कार्यक्रमले पोषण, स्वास्थ्य र खाद्य सुरक्षाबारे व्यवहारिक ज्ञान प्राप्त भएको प्रतिक्रिया दिएका थिए ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया