निलो मसि 
घनश्याम भर
(विजयनगर) कपिलवस्तु, २९ बैशाख ।
विजयनगर गाउँपालिका- २ स्थित वडा कार्यालय लालपुरमा सञ्चालन हुँदै आएको आयुर्वेद स्वास्थ्य सेवा कार्यक्रम प्रभावकारी बन्दै गएको छ । गाउँघर तथा सहरी क्लिनिक एवं नसर्ने रोग सञ्चालन कार्यक्रममार्फत प्रदान गरिएको सेवाबाट स्थानीय सेवाग्राही उत्साहित भएका छन् । यस कार्यक्रममार्फत एक वर्षमा ६ सय भन्दा बढी सेवाग्राहीहरु लाभ लिएका छन् ।
विजयनगर आयुर्वेद शाखाका अनुसार याे बैशाख महिनामा मात्रै ७२ जनाले स्वास्थ्य परीक्षण तथा उपचार सेवा लिएका छन् । सेवा अन्तर्गत उच्च रक्तचापका १० जनाको परीक्षण गरिएको थियो भने ३२ जनाको रेन्डम रक्त जाँच गर्दा १२ जनामा मधुमेह समस्या देखिएको आयुर्वेद शाखाकी प्रमुख बिमला कुमारी चौधरीले जानकारी दिइन् ।
उनका अनुसार सेवा लिन आउने अधिकांश बिरामीहरू बाथरोग, मधुमेह, श्वासप्रश्वास सम्बन्धी समस्या तथा अम्लपित्त (ग्यास्ट्रिक) समस्याबाट पीडित रहेका छन् । कार्यक्रममा ८ जना ज्येष्ठ नागरिकले समेत सेवा लिएका थिए ।
स्थानीय तहमै नियमित रूपमा स्वास्थ्य सेवा उपलब्ध हुन थालेपछि सेवाग्राहीलाई उपचारमा सहज भएको बताइएको छ । विशेषगरी टाढा स्वास्थ्य संस्था पुग्न कठिनाइ भोगिरहेका ज्येष्ठ नागरिक तथा दीर्घरोगीहरू यस सेवाबाट लाभान्वित भएका छन् । नियमित स्वास्थ्य परीक्षण, परामर्श तथा औषधी सेवाले बिरामीलाई उपचारप्रति सचेत र नियमित हुन मद्दत पुगेको जनाइएको छ ।
स्थानीय सेवाग्राहीहरूले गाउँमै स्वास्थ्य जाँच तथा परामर्श सेवा पाउँदा समय र खर्च दुबै बचत भएको बताएका छन् । नियमित सञ्चालन हुँदै आएको यस कार्यक्रमले नसर्ने रोगको पहिचान तथा नियन्त्रणमा समेत सकारात्मक योगदान पुर्याएको जनाइएको छ ।
विजयनगर गाउँपालिका-२ वडा कार्यालय लालपुरमा प्रत्येक महिनाको १४ र २९ गते सेवा प्रदान गरिँदै आएको छ । यदि उक्त दिन सार्वजनिक बिदा परेमा भोलिपल्ट सेवा सञ्चालन गरिने आयुर्वेद शाखाले जनाएको छ ।
निलो मसि 
राम अवतार चौधरी कपिलवस्तु, १४ माघ । गायक उत्तम चौधरी र अन्नु चौधरीको सुमधुर सांगीतिक स्वरमा सजिएको “दिल जिगर तुहि…
प्रतिक्रिया